Упатство › За администратори

Попусти и ваучери

Тука ги поставуваш готовите попусти што келнерот ги дава на сметка, слободниот попуст, подарок-ваучерите и happy hour (пониски цени во одредени денови и часови). Во табот Извештај гледаш колку пари отишле на попусти, ваучери и happy hour.

Каде се наоѓа: Админ → Финансии → Попусти и ваучери. Во пребарувањето на админ панелот: „попуст", „ваучер", „happy hour", „хепи авер", „утринска цена", „посебна цена", „акција", „слободен попуст", „исклучени производи".

Екранот има четири таба: Попусти, Ваучери, Happy hour и Извештај. Секој таб има свое копче Зачувај (каде што има што да се зачува); промените не важат додека не го притиснеш.

Попусти

Готови попусти (до 5) што келнерот ги избира со копчето Попуст на екранот за нарачка. Секој попуст бара админ код, а на сметката се памети кој го одобрил.

1. Попусти — избраниот таб.
2. Ваучери — издавање и листа на ваучери.
3. Happy hour — пониски цени по термин.
4. Извештај — колку чинеле попустите.
5. Попустите се овозможени (копчето е видливо на нарачка) — главниот прекинувач. Исклучено: копчето Попуст не се гледа на екранот за нарачка и готовите попусти не може да се применат. Стандардно е исклучено.
6. Име на попустот — на пр. „Редовни гости", „Вработени", „Студенти". Ова име келнерот го гледа на копчето и се печати во извештајот.
7. % / ден — дали попустот е процент од сметката или фиксен износ во денари. Полето десно е вредноста (на пр. 10 = 10% или 10 ден). Фиксниот износ се дели на ставките сразмерно на нивната цена.
8. Корпа (Избриши) — го трга попустот од листата (по Зачувај).
9. Слободен попуст (келнерот внесува износ/процент со админ код) — овозможува келнерот сам да внесе кој било износ или процент (види подолу).
10. Додај попуст — додава нов ред со „10%". Сиво кога веќе има 5 попусти.
11. Зачувај — ги зачувува сите попусти и поставки на табот. Ако админ панелот не е отклучен, пишува „Отклучи го админ панелот."

Правила на нарачката: - На една сметка може само еден попуст. Ако веќе има попуст, прво мора да се отстрани („Веќе е применет попуст — прво отстрани го"). - Попуст не може на затворена сметка или на сметка без ставки.

Слободен попуст и производи без попуст

1. Слободен попуст — штиклирано. На екранот за нарачка келнерот добива можност да внесе свој износ или процент, со админ код. На сметката попустот се гледа под името „Попуст".
2. Сите маси — слободниот попуст е достапен на обичните маси (не и на хотелските соби).
3. Само хотел — достапен само на сметките на хотелските соби (модул „Хотел"), не и на обичните маси.
4. Без попуст за: — покажува колку производи се исклучени. „попустот важи за сите производи" значи дека нема исклучени; инаку „N производи — цената им останува иста".
5. Избор на производи — пребарај и штиклирај ги производите што никогаш не добиваат слободен попуст (на пр. цигари, производи со фиксна цена). На сметка со такви производи, попустот се пресметува само на другите ставки. Ако на сметката има само исклучени производи, попустот не се применува („Попустот не важи за ниту една ставка на сметката").

Исклучените производи важат само за слободниот попуст, не и за готовите попусти.

Ваучери

Подарок-ваучер со фиксна вредност во денари. Се печати на термалниот принтер (лого, код, вредност) и гостинот го користи еднаш, при плаќање.

1. Издади ваучер — картичката за нов ваучер.
2. Вредност (ден) — задолжително; без вредност копчето е сиво.
3. Важи до (опц.) — последниот ден кога ваучерот важи (вклучително тој ден). Празно = важи без рок.
4. Белешка (опц.) — повод или име на гостинот, само за тебе.
5. Издади + печати — веднаш го издава ваучерот со нов код од 8 букви и бројки (без 0/O и 1/I/L, за да не се мешаат) и го печати на термалниот принтер. Вредноста и белешката се бришат, рокот останува за следниот ваучер.
6. Издадени ваучери — листа на сите ваучери: Код, Вредност, Статус, Издаден (датум и кој го издал), Важи до.
7. Статус: - активен (зелено) — може да се користи; - искористен — веќе е наплатен на сметка; - истечен (жолто) — поминал рокот; - поништен — рачно поништен.

Копчиња во секој ред: - Печати (икона печатач) — го печати ваучерот повторно, ако гостинот го изгубил или печатењето не успеало. - Поништи (корпа, црвено) — само кај активни: бара потврда „Сигурно сакаш да го поништиш ваучерот „КОД"?". Поништениот ваучер не може да се користи. Искористен ваучер не може да се поништи.

Ако нема ниту еден: „Нема издадени ваучери."

Како се користи: при наплата келнерот го внесува кодот во полето Ваучер во дијалогот за наплата (големи/мали букви и цртички не се важни). Вредноста се одзема од сметката. Ако ваучерот е поголем од сметката, остатокот се губи (ваучерот се користи само еднаш). Ако ваучерот ја покрива целата сметка, таа не може да се затвори фискално (фискалниот печатач не прима сметка од 0 ден) — се наплаќа термално.

Happy hour

Во избраните денови и часови избраните производи автоматски добиваат пониска цена — и на касата и на QR менито. Цените во менито не се менуваат: попустот важи само додека трае терминот.

1. Вклучено — главниот прекинувач. Ако е вклучено и сега трае термин, покрај насловот стои жолта ознака активно сега.
2. Не важи за нарачки за носење — нарачките за носење секогаш се по редовна цена.
3. Не важи при плаќање со картичка (се наплаќа редовна цена) — ако сметката се плати со картичка, при наплатата цените на happy hour ставките се враќаат на редовни. Ако на ставката подоцна е даден и попуст, тој останува сразмерно.
4. Попуст — % или ден и вредноста во полето десно: колку се намалува цената на секој производ од опфатот (на пр. 20%). Цената никогаш не оди под 0.
5. Денови (пон, вто, сре, чет, пет, саб, нед) — портокалово = терминот важи тој ден.
6. Време од – до — почеток и крај на терминот. Терминот може да премине преку полноќ (на пр. 22:00 – 02:00).
7. Корпа (Избриши термин) — го трга терминот.
8. Додај термин — додава нов термин (стандардно петок и сабота, 16:00 – 19:00). Може да имаш повеќе термини, на пр. утро и вечер.
9. Категории (на пр. ПИЈАЛОЦИ) — кликни за да ја вклучиш целата категорија во happy hour (портокалова рамка = вклучено).
10. Поткатегории (на пр. Кафе, Пиво) — исто, за поткатегорија.

Важно: ако не избереш ниту категорија, ниту поткатегорија, ниту производ, попустот не важи за ништо.

1. Опфат — што влегува во happy hour: категориите, поткатегориите и поединечните производи се собираат.
2. Додај поединечен производ (барај)… — пиши дел од името.
3. + производ — клик го додава. Додадените се гледаат како ознаки со ✕ за отстранување.
4. Посебни цени во терминот — производ со своја цена во терминот (на пр. еспресо 59 ден до 11ч). Посебната цена важи наместо попустот погоре, и важи дури и ако производот не е во опфатот.
5. Додај производ (барај)… — пребарај производ за посебна цена.

1. Посебни цени во терминот — листа на производи со своја цена.
2. редовна — редовната цена од менито, за споредба.
3. Поле за цена — цената во терминот, во денари. На почеток е редовната цена — смени ја.
4. Корпа (Отстрани) — го трга производот од посебните цени.
5. Зачувај — ги зачувува сите поставки на happy hour. Новата цена важи за ставките додадени после зачувувањето.

Како работи на нарачка: цената се одредува во моментот кога келнерот ја додава ставката. Ако ставката е додадена во 18:55, а терминот завршува во 19:00, таа останува со цената од happy hour и после 19:00. Ставките со happy hour се бројат одделно во извештајот.

Извештај

Колку пари отишле на попусти, ваучери и happy hour во избраниот период.

1. Недела — последните 7 дена (вклучително денес). Стандардно.
2. Месец — последните 30 дена.
3. Датуми од – до — слободен период.
4. Попусти — вкупно одземено со попусти и на колку сметки.
5. Ваучери (искористени) — вредноста на искористените ваучери во периодот. Под неа: колку се искористени, колку се издадени (и нивна вредност) и активни — вредноста на сите ваучери што уште може да се искористат (обврска кон гостите).
6. Happy hour — колку е намалено со happy hour и на колку ставки.
7. По попуст — секој попуст по име: колку пати (×N) и вкупен износ. Слободниот попуст се гледа како „Попуст".
8. Кој одобрил најмногу — по вработен што го внел админ кодот: колку пати и колку пари.

Ако нема податоци во некоја листа: „Нема."

Чести ситуации / совети

Келнерот не го гледа копчето „Попуст". Во табот Попусти штиклирај Попустите се овозможени и притисни Зачувај.

Сакам попуст за вработените од 30%. Попусти → Додај попуст → име „Вработени", %, 30 → Зачувај. Келнерот го избира на сметката со админ код.

Гостинот бара попуст, но не за цигарите. Вклучи Слободен попуст, во Без попуст за штиклирај ги цигарите, Зачувај. Готовите попусти секогаш важат за сите ставки.

Сакам утринско кафе по 59 ден до 11 часот. 1. Happy hour → Вклучено. 2. Додај термин → штиклирај ги сите денови, време 07:00 – 11:00. 3. Во Посебни цени во терминот пребарај „еспресо", додај го, внеси 59. 4. Зачувај.

Happy hour е вклучен, но цената не се менува. Провери: дали терминот ги има денешниот ден и часот, дали производот е во Опфат (или има посебна цена), дали вредноста на попустот е поголема од 0, и дали ставката е додадена во терминот. За нарачки за носење и плаќање со картичка провери ги двата прекинувачи.

Гостинот го изгубил ваучерот. Во Ваучери најди го по датум/белешка и притисни Печати за нов слип. Ако се плашиш дека некој друг ќе го искористи, Поништи го стариот и издади нов.

При наплата пишува „Ваучерот е веќе искористен" или „истечен". Ваучерот е веќе наплатен или поминал рокот. Провери го статусот во Издадени ваучери.

Колку ваучери се во оптек? Извештај → плочката Ваучери → активни е вредноста на сите неискористени ваучери.

Поврзано

• Извештаи и трошоци — промет и профит.
• Мени — категории, поткатегории и цени на производите.
• QR мени — каде гостите ги гледаат цените од happy hour.
• Хотел — слободен попуст само за хотелските соби.